سياسة الخصوصية

1. منو إحنا

حلاقك منصة حجز وطابور لمحلات الحلاقة، مقرها بغداد، العراق. هاي السياسة تخص الموقع halaqak.com، ولوحة أصحاب المحلات، وصفحات الحجز والطابور، وبرنامج السفراء.

2. شنو البيانات اللي نحفظها

إذا انت زبون تحجز أو تاخذ دور بمحل:

• اسمك ورقم موبايلك.
• الموعد أو الدور، والخدمة، والحلاق، والملاحظة اللي تكتبها.
• سجل زياراتك لنفس المحل (لبطاقة الولاء والتذكير)، والتقييم إذا اخترت تقيّم.

إذا انت صاحب محل: اسمك، وإيميلك، ورقم تلفونك، ومعلومات محلك وخدماته وأسعاره، والصور اللي ترفعها، وسجل اشتراكك ودفعاتك. كلمة السر تنحفظ مشفرة، وحتى إحنا ما نگدر نشوفها.

إذا انت سفير: اسمك، ورقمك، ومدينتك، وطريقة استلام أرباحك.

ما نجمع موقعك الجغرافي، ولا جهات اتصالك، ولا أي شي من تلفونك.

3. ليش نستخدمها

• حتى ينحجز موعدك أو دورك، ويوصل للمحل.
• حتى يگدر المحل يتواصل وياك بالواتساب بخصوص موعدك، إذا وافقت على هذا وقت الحجز.
• حتى تنحسب زياراتك ببطاقة الولاء.
• حتى يدير صاحب المحل مواعيده وحسابه.
• حتى نرسل إيميلات ضرورية بس، مثل رابط "نسيت كلمة السر".

ما نستخدم بياناتك بإعلانات، ولا نبيعها، ولا نشاركها لأغراض تسويقية.

4. منو يشوفها

• المحل اللي حجزت عنده بس. كل محل يشوف زبائنه هو، وما يگدر يشوف زبائن محل ثاني.
• بشاشة الطابور العامة يطلع رقم دورك واسمك الأول بس.
• خدمات ضرورية حتى يشتغل الموقع: استضافة السيرفر (Hostinger)، وإرسال الإيميلات، وواتساب (Meta) لرسائل التذكير، وGoogle إذا اخترت تسجل دخول بحساب Google (يوصلنا اسمك وإيميلك بس).
• الجهات الرسمية، فقط إذا يلزمنا القانون.

5. وين تنحفظ وشلون نحميها

• البيانات محفوظة على سيرفر محمي بمركز بيانات بأوروبا (ألمانيا).
• كل الاتصال بالموقع مشفّر (HTTPS)، وكلمات السر مشفرة، وعلى السيرفر جدار حماية وحظر تلقائي لمحاولات الاختراق.
• نسوي نسخة احتياطية يومية حتى ما تضيع البيانات.
• ما في نظام بالعالم محمي 100%، بس نسوي كل اللي نگدر عليه، وإذا صار أي خرق نبلغ المتضررين بأسرع وقت.

6. شكد نحتفظ بيها

• بيانات الزبائن: طول ما المحل يستخدم حلاقك، أو لحد ما الزبون يطلب حذفها.
• حسابات المحلات: بعد غلق الحساب نحتفظ بالبيانات 30 يوم حتى تگدر تطلب نسخة منها، وبعدها تنحذف.
• النسخ الاحتياطية: تنمسح تلقائياً بعد 60 يوم.
• سجلات الدفع ممكن نحتفظ بيها أطول إذا يلزمنا القانون.

7. حقوقك

• حذف بياناتك كزبون: من رابط موعدك اللي يوصلك بالواتساب، اضغط "امسح معلوماتي"، وتنحذف بياناتك من هذاك المحل فوراً.
• تشوف أو تصحح بياناتك: راسل المحل، أو راسلنا.
• توقف رسائل التذكير: گول للمحل، أو احذف بياناتك من الرابط.
• صاحب المحل: يگدر يطلب نسخة من كل بيانات محله، أو حذفها، بمراسلتنا.

8. الكوكيز

نستخدم بس كوكيز ضرورية حتى تبقى داخل حسابك (تسجيل الدخول)، وحتى يتذكر الموقع لغتك ومظهره (فاتح أو ليلي). ما نستخدم كوكيز إعلانات، ولا أدوات تتبع، ولا تحليلات خارجية.

9. التعديلات والتواصل

إذا غيّرنا هاي السياسة بشي مهم، نبلغ أصحاب المحلات قبلها، ونحدّث التاريخ فوق.

• حلاقك – بغداد، العراق
• الإيميل: support@halaqak.com
• إنستغرام وتيك توك: @halaqak

وشوف همين شروط الاستخدام.